Tripura 2023 : Candidate zingah crorepati 45, criminal case nei 41 awm

Tripura legislative assembly inthlan neih tura candidate zingah hausa tawntaw, crorepati leh thubuai nei lai an ṭhahnem hle.

Tripura Election Watch leh Assocation for Democratic Reforms (ADR) chuan candidate 259-te affidavit thehluh an zirchiang a ni. Candidate zingah 140 chu national party ami niin, regional party aṭangin mi 9, registered unrecognised party aṭangin 52 leh independent candidate 58 an ni. Hmeichhe candidate 30 (12%) an awm bawk.

Candidate 259 zingah 41 (16%) chu criminal case nei lai niin, 21 (8%) chu serious criminal case nei an ni. Candidate zingah hian tualthah tuma puhna thubuai nei 8 an awm. Kum 2018 assembly inthlanah khan candidate 297 an awm a, an zinga 22 (7%) in criminal case nei an ni.

Tun ṭumah hian Congress party candidate 13 zinga 7 (54%) chu criminal case nei an ni a, CPI(M) candidate 43 zingah 13 (30%), leh BJP candidate 55 zinga 9 (16%) chu thubuai nei lai an ni bawk.

Candidate 45 (17%) chu hausa tawntaw, crorepati an ni. An zinga 17 chu rorellai, BJP candidate niin, Tipra Motha aṭangin 9, CPI-M 7, Congress 6 leh Trinamool Congress (TMC) 4 an awm.

BJP candidate 55-te hausakna chu chawhrualin mi pakhatin Rs vbc 1.86 hu nei ang an ni a, chawhrualin Congress candidate chuan Rs vbc 2.20, CPM candidate-in Rs nuai 53.94 leh Tipra Motha party candidate-te chuan Rs nuai 78.57 ṭheuh nei ang a ni. Kumin inthlan tura candidate zawng zawngte hausakna hi chawhrualin Rs nuai 88.37 zel nei ang an ni a, kum 2018 inthlanah khan candidate-te hausakna hi Rs nuai 46.92 anga chhut a ni.

Tripura inthlan lo awm turah BJP candidate, deputy chief minister Jishnu Dev chu a hausa ber a, a thil neih hi Rs vbc 15 chuang hu a ni. Rs vbc 13 chuang hu nei, BJP candidate bawk chief minister nilai Manik Saha chuan a dawt. Candidate hausa pathumna chu Tipra Motha candidate, Abhinit Sarkar niin Rs vbc 12 hu a nei.

Candidate zingah West Tripura district-a independent candidate, Hiramuni Debbarma chu rethei berin, affidavit-a a tarlan danin a thil neih hi Rs 700 hu chauh a ni.

Thiamna lamah candidate 116 (45%) chu graduate leh a chunglam an ni a, 139 (54%) chu Class 5-12 inkar niin, diploma holder pahnih bakah ziak leh chhiar thiam pahnih an awm bawk.

Candidate 63 (24%) chu kum 25-40 inkar niin, kum 41-60 inkar 142 (55%) an awm a, kum 61-80 inkar 54 (21%) an awm bawk a ni.

Tripura assembly inthlan hi February 16-ah neih a ni dawn a, March 2 ah vote chhiar a ni ang.