Assam sorkarin child marriage do hna kalpui dan sawisel

Assam sorkarin an state-a kum tling loa inneih, child marriage tihtawp tuma hma lak dan chuan sawisel a hlawh zui hle.

Sorkarin kum tling loa inneite a dapnaah mi 2,442 chuang zet man an ni tawh a, mahse an mi man zinga tam tak chu nupui atana hmeichhia, kum tling lo neite an ni. Chhungkaw eizawngtu, pa ber man a nih avangin mi tam takin harsatna an tawh phah a, hmun hrang hrangah an nupui leh faten lungawi lohna an lantir.

Eptu party-te pawhin BJP sorkar chet dan chu sawiselin, politics lama hlawkna uma dan palzutah an puh a, police-te chu mipuite thlabar taka siamah an puh. Assam Trinamool Congress president Ripun Bora chuan Gauhati High Court chief justice hnenah ngenna thlenin, state sorkarin dan a palzut chungchangah inrawlh a, dan kalhah thiltih chu dang turin a ngen. Assam Congress hotu Bhupen Kumar Borah pawhin, BJP sorkar chuan dan hmang sualin, state mipuite chungah manganna nasa tak a thlen a ni, a ti bawk. AIMIM chief Asaduddin Owaisi chuan Assam sorkar chuan child marriage tihtawp a tum tak tak a nih chuan mipuite zirtirna pek ṭhat a ngaihtuah hmasa phawt tur a ni, a ti.

Thawhṭanni khan Cachar district-ah hmeichhe tleirawl, kum 17 mi pasal nei tur chu kum a la tlin loh avangin a chhungten an inneih tum chu kaltlangpui lo turin an dang a, hei vang hian a intihlum ta a ni.

State cabinet chuan child marriage tihtawp tuma hma a laknaah, hmeichhia kum 14 tling lo nupui atana neite chu Protection of Children from Sexual Offences Act, 2012 (POCSO) hnuaiah thubuai siamsak leh, kum 14-18 inkar nupuia neite chu Prohibition of Child Marriage Act, 2006 hnuaia thubuai siamsak turin a lo ti tawh a ni.