Meghalaya election 2023 :; Nomination paper thehlut 379 an awm

9th February, 2023

Meghalaya legislative assembly inthlan, February 27-a neih tura chuh tum, nomination paper thehlut mi 379 an awm.

Nomination paper thehluh theih hun hi Thawhlehni khan a tawp a, chief electoral officer RF Kharkongor chuan candidate 379 in nomination paper hi thehlutin, an zingah hian hmeichhia 37 an awm tih a sawi. Nomination paper-te hi nimin khan enfiah an ni a, candidate inhnukdawk duh tan February 10 hun hawn a ni.

Assembly bial 60-a inthlanna neih tura chuh tum zingah hian MLA ṭanglai 60 te an tel kim vek. Chief minister leh National People's Party (NPP) Conrad K Sangma chu a bial ngai, West Garo Hills district-a South Tura constituency-ah a ding leh dawn. United Democratic Party (UDP) hruaitu, speaker Metbah Lyngdoh pawh Eastern West Khasi Hills district-a Mairang constituency-ah a ding leh dawn bawk.

Kum 2018 inthlana Congress ticket-a thlan tlin, Trinamool Congress (TMC)-a inpe ta, chief minister hlui leh assembly-a leader of opposition, Mukul Sangma chuan TMC ticket-in bial pahnih, East Garo Hills-a Songsak leh West Garo Hills-a Tikrikilla bialah a chuh dawn a ni.

Congress state party president, MP nilai Vincent H Pala chuan East Jaintia Hills district-a Stunga-Saipung constituency-ah a chuh bawk ang.

Regional party hruaitu - Banteidor Lyngdoh (People's Democratic Front), Ardent Basaiawmoti (Voice of the People), Martle Mukhim (Hill State People's Democratic Party)-te pawhin inthlan an chuh dawn a ni.

TMC-NPP intihbuainaah mi 4 an hliam

Meghalaya-a West Garo Hills district-ah eptu pawl, Trimamool Congress (TMC) leh rorellai, Natioanl People's Party (NPP) worker-te intihbuainaah mi paliin hliam an tuar tih chief electoral officer FR Kharkongor chuan a sawi.

Police-te chuan Thawhlehni zan dar 10.45 vel khan Phulbari biala Charbatapar khuaah buaina hi a chhuak tih sawiin, NPP MLA hlui, TMC zawm ta, SG Estamur Mominin-a'n an khua a tlawh chu NPP worker ṭhenkhatin kalchilhin buaina hi a chhuak ta niin an tarlang. Buaina chhuak vang hian mi pakua man an ni a, mahse a hnuah chhuah leh nghal an ni. Party pahnihte hian buaina chawk chhuaktuah an inpuh tawn a ni.