Nagaland election 2023 : Candidate 225-in nomination paper thehlut

Nagaland legislative assembly inthlan neih turah candidate 225-in nomination paper an thehlut.

Assembly inthlan hi February 27-ah neih a ni dawn a, nomination paper thehluh hun tawp ni, Thawhlehni khan candidate 101 in an thehlut a ni. Heng mite nen hian nomination paper thehlut hi mi 225 an nih thu chief electoral office chuan a tarlang. February 10 thleng inhnuhdawh theih a ni.

Rorellai, Nationalist Democratic Progressive Party (NDPP) chuan Bharatiya Janata Party (BJP) nena inremna an lo siam tawh angin, assembly bial 60 awmah bial 40-ah candidate an siam a, BJP-in bial 20 an chang thung. Congress party chuan bial 25-ah candidate an siam a, Naga People's Front (NPF)-in 22, LJP(Ram Vilas) in 17, National People's Party (NPP) in 12, Nationalist Congress Party (NCP)-in 11, RPI(A) leh JD(U) in pariat ve ve, RJD-in pali, RPP leh CPI-in candidate pakhat ve ve an nei. Independent candidate 25 an awm bawk.

Chief minister leh NDPP hotu, Neiphiu Rio chuan '11 Northen Angami-II' constituency-ah a chuh leh dawn a ni.

ABPF-in election prayer rally huaihawt

Ao Baptist Pastors’ Fellowship (ABPF) chuan assembly inthlan thianghlim leh felfai tak neih a nih theihna atan, Thawhlehni khan Mokokchung-ah clean election rally an huaihawt.

Rally-ah hian Mokokchung-a pastor, kohhran member leh district thuneitute an tel a, hmun pangaah chawlin, heng hmunahte hian pastor-te chuan “Nagaland for Christ”, “Clean Election against Corruption”, “Vote for Clean Election”, “Free and Fair Election” leh “Vote against Communalism” tih thupui hmangin thu an sawi.