Child marriage case-a mante awmna tur temporary jail 2 siam dawn

Assam sorkarin kum tling loa nupui/pasal inneihna tihtawp tuma beihpui a thlak mekah, kum tling lo nupui nei mi ṭhahnem tak a man tawh. Beihpui thlak chhunzawm zel a nih avangin Goalpara leh Cachar district-ah an mi mante dahna tur, temporary jail pahnih an siam dawn.

Cachar superintendent of police (SP) Nomal Mahatta chuan temporary jail siamna tur hian thuneitu lam aṭanga phalna an hmuh tawh thu sawiin, Silchar-a sorkar hmunah siam a ni dawn tih a sawi. A building leh infrastructure pawh a awm sa vek a, security arrangement lam buaipui mek a ni, a ti.

Mahatta chuan facility awm sate a khah tawh avangin temporary jail hi siam a ni dawn tih a sawi bawk.

Goalpara district-ah pawh Matia-a foreigner nia rinhlelhte dahkhawmna hmun chu child marriage case-a mante dahna atan hman a ni dawn bawk. Matia transit camp hi mi 3,000 vel awm theihna tur a ni.

Hetih lai hian eptute chuan sorkarin child marriage do hna a kalpui dan leh, police-te chet dan chu an sawisel nasa hle. Assam sorkar hian February 3 aṭang khan child marriage chungchangah beihpui a thlak ṭan a, police-te chuan mi 2,600 chuang an man tawh a, thubuai 4,074 ziahluh a ni tawh bawk a ni. Man zingah hian kum tling loa nupui nei mi eng emaw zat an tel a, hmeichhia 78 vel an man tel bawk.

Chhungkaw pa, eizawngtu ber man an nih avang hian an mi mante nupui leh chhungte chuan hmun hrang hrangah lungawi lohna an lantir. Kailash Satyarthi Children's Foundation (KSCF) pawhin Assam sorkar hnenah, an pasal an mansak tak chhungte hnenah bail-a chhuahtir an nih hma chu thla tin ṭanpuina, Rs 2,000 pe turin a phut.

KSCF managing director Rahul Kumar Shrawat chuan, " Assam sorkarin child marriage tibo tura chak taka hma a la hi kan pawl chuan ṭha kan ti hle a ni. Hei hi ram chhunga state sorkarin hma a lakna hmasa ber a ni hial ang. Hemi rual hian he thilin a nghawngte hi ngaihtuah tel turin sorkar chu kan ngen a ni. Kum tling loa pasal neih tir, an pasalte man an nih avanga harsatna tawk tam tak an awm a, heng mite chhawmdawlna leh, an harsatna tihnep sak dan hi sorkar chuan a ngaihtuahsak a ngai a ni," a ti.