Sikkim-ah darkar 12 awh bandh huaihawt

Supreme Court-in Sikkimese Nepali-te 'immigrant' tia a sawi avang leh, Sikkim-a lo khawsa rei tawhte income tax awltirna tura a thupekah 'Sikkimese' tih a paih avangin lungawi lohna lantirin, Nilaini khan state pumah darkar 12 awh bandh huaihawt a ni.

Bandh hi Joint Action Council huaihawt a ni a, rorellai party Sikkim Krantikari Morcha leh eptu pawl, Sikkim Democratic Front party pawhin an thlawp a ni. State pumah bandh hi boruak muanawm tak hnuaiah neih a ni tih JAC chuan an sawi.

Nilaini tlai khan Supreme Court chuan Sikkimese-Nepali-te sawina atana 'people of foreign origin' ti a hman chu a sut leh bawk. Court-in a thupek a siamṭhat leh hnuah, JAC chuan 'Sikkimese' chungchang a sawidan tichiang turin an phut. Hei bakah hian Sikkim mite tana hamṭhatna pekna, Article 371F chu May 8, 1975 agreement siam anga kalpui leh an phut bawk.

JAC chuan Sikkim legislative assembly hnenah, 'Sikkimese' tih sawifiahna leh, he miin a huam chin tichianga resolution pass turin an phut tih an sawi. Court-in 'immigrant' tih a paih ringawt chu a la tawk lo a ni, an ti.