Nagaland leh Meghalaya poll : Nomination paper-te endik a ni

Nagaland : Nagaland legislative assembly inthlan neih tur atana nomination paper thehluh 222-te chu enfiah a nih hnuah, 200 pawm a ni.

February 27-a assembly inthlan neih tura chuh tumin mi 225 in nomination paper an thehlut a, mahse pathum an inhnukdawk leh nghal a ni. Election official-te chuan mi 222-te paper an endik hnuah, 22 an hnawl.

Candidate atana pawm, mi 200 zingah hian hmeichhia pali an tel. Inthlanah hian polical party 13, Nationalist Democratic Progressive Party (NDPP), Bharatiya Janata Party (BJP), Naga People’s Front (NPF), the Congress, Lok Janshakti Party (Ram Vilas), the National People’s Party (NPP), Janata Dal (United), Republican Party of India (Athawale), Nationalist Congress Party, Rising People’s Party, Rashtriya Janata Dal leh CPI chuan candidate an nei a, independent candidate 20 chuang an awm bawk. Nimin thleng inthlana chuh tumte tan a la inhnuhdawh theih a ni.

Rs vbc 31 chuang hu thil man tawh

Nagaland-a model code of conduct (MCC) hman a nih hnuah, enforcement agency hrang hrang chuan pawisa fai, zu, ruihhlo leh voter-te hnena a sem tum thil hrang hrang an man tawh a, an thil man hi cheng vaibelchhe 31 chuang hu a tling tawh.

Nagaland chief electoral officer's office-a media cell-in a tarlan danin, pawisa fai an man hi Rs vbc 1.62 a ni a, heng bakah hian zu Rs vbc 4.2 chuang man, ruihhlo Rs vbc 23.32 hu, leh thil sem tur hrang hrang Rs vbc 1.86 chuang hu man a ni tawh tih an tarlang.

Meghalaya : Candidate 4 nomination hnawlsak an ni

Meghalaya legislative assembly inthlan neih tur atana nomination paper thehlut zingah pali chu hnawl a ni. Nomination hnawlsakte hi National People’s Party (NPP) candidate pathum leh United Democratic Party (UDP) candidate pakhat an ni.

Chief electoral officer (CEO) FR Kharkongor chuan nomination paper lut 379 awmin, heng zinga 375 chu pawm a nih thu a sawi. Candidate pawmte hi mipa 339 leh hmeichhia 36 an ni.

Party 2 worker-te intihbuaina thlengah mi 31 man an ni

Tun kar tir lama West Garo Hills district-a rorellai, National People's Party (NPP) leh eptu pawl, Trinamool Congress (TMC) worker-te intihbuaina thleng chungchangah party pahnih worker 31 man an ni tawh.

Police-te chuan an mi mante hi Thawhlehni zana 46 Phulbari assembly constituency huam chhunga Charbatapara khuaa buaina chhuaka inhnamhnawihte an ni tih an sawi. SP Vivekanand Singh chuan an mi mante hi TMC worker 16 leh NPP worker 15 an nih thu a sawi.