Gauhati HC-in Akhil Gogoi laka thubuai siam a remtihsak

Gauhati High Court chuan Ningani khan National Investigation Agency (NIA) chu Citizenship Amendment Act (CAA) duh lohna lantir leh, Maoist nen inzawmna neia puh chungchangah, independent MLA Akhil Gogoi leh a thurualpui mi pathumte chu thubuai siam a remtihsak.

Special NIA court chuan kum 2021, July thla khan Akhil Gogoi leh midang pathumte hi CAA dodalna lantir chungchanga thubuai siamsakah thiam a lo chantir tawh a ni. Mahse hmei hnu hian agency chuan Gauhati High Court-ah petition a thehlut a, justice Suman Shyam leh Malasri Nandi awmna division bench chuan ngaihtuahin, an case chu tinung leh a, thubuai siamsak leh hi a remtihsak leh ta a ni. High Court chuan Gogoi hian CAB/CAA dodalna lantir tura mipuite thlem bakah, a kaihhruainaa hmun hrang hrangah nawrh huaihawtnaah tharum thawhna te a thleng a ni, a ti. He case hi special NIA court-ah pawh ngaihtuah a ni leh ang.

Raijor Dao hotu, Akhil Gogoi chuan midang pathumte nen hian February 23-ah special NIA court-a inlan tura hriattir an nih thu a sawi. Gogoi chuan High Court thupek hi Supreme Court-ah khin a tum tih a sawi bawk.