Assam CM-in KNP tlawh turin DiCaprio a sawm

Assam chief minister Himanta Biswa Sarma chuan hollywood actor leh environmentalist, Leonardo DiCaprio chu Kaziranga National Park tlawh turin a sawm.

DiCarprio hian a instagram-ah Assam sorkarin kum 2021 aṭanga Kaziranga National Park-a ki pakhat nei samak pel ṭhin veng leh tihtawp tura hma laknaah an hlawhtlin chungchang tarlangin, kum 1977 hnuah a vawi khatna atan kum 2022-ah park-ah samak pel an awm loh thu a tarlang. DiCarprio chuan World Wildlife Fund report aṭanga KNP-a samak 2,200 zet an awm thu tarlante pawh a sawilang bawk.

Assam sorkar hmalakna a fak avang hian Assam CM chuan a twitter kaltlangin DiCaprio hi lawmthu a hrilh a, Kaziranga leh Assam tlawh turin a sawm nghal a ni.

Kaziranga National Park hi samak ki khat nei tamna hmun a nih vangin khawvel huap pawha hriat lar a ni. He park-a samak ki khat nei awm hi khawvel puma awm zat hmun thuma ṭhena hmun hnih an tling. Mahse samak ki sumdawnna atana hman tumin kumtin sapeltuten an pel nasa ṭhin a, East Asia lamah man to tak takin an hralh ṭhin nia sawi a ni. Hei vang hian Assam sorkar chuan samak humhalh tura hma lain, nikum khan park-ah sapeltute kuta thi samak an awm lo a ni.

Official data-a tarlan danin, kum 2013 leh 2014 khan park-a samak kahhlum hi 27 ve ve an awm a, kum 2015-ah 17, 2016-ah 18 an awm. Kum 2018-ah tlahniamin sapeltute kuta thi paruk an awm a, 2018-ah pasarih, 2019-ah pathum, 2020 leh 2021-ah pahnih ve ve an awm bawk.