Nagaland 2023 : BJP candidate chuhtu awm loin tling nghal

Nagaland legislative assembly inthlan awm turah, Akuluto consituency-a BJP candidate Kazheto Kimini chu a khingpui tur awmchhun, Congress candidate a inhnuhdawh avangin a tling nghal.

Candidate-te inhnuhdawh theih hun tawp, kar liam ta Zirtawpni khan Akuluto biala Congress candidate, Khekashe Sumi chu a inhnuhdawh avangin, he bialah hian vote thlak ngai loin candidate awmchhun, Kazheto Kimini chu a tling ta nghal a ni.

Kum 68 mi, Kimini hi Akuluto bial MLA term hnih a chelhna a tur a ni a, kum 2018 inthlanah khan BJP ticket bawkin thlan tlin a lo ni tawh bawk.

Congress party chuan Sumi chu nomination thehluh dawna an party zawm chauh a nih thu an sawi. All Inida Congress Committee (AICC) secretary in charge Nagaland, Ranajit Mukherjee chuan, " Sumi hi RJD youth chief a ni ṭhin a, nomination thehluh dawn khan he bialah hian chuh a duh thu a rawn sawi a ni. He constituency-ah hian candidate kan dah loh avangin a duh dan ang chuan kan tihtir a, a inhnuhdawh leh avang hian kan tan hloh leh channa engmah a awm hran lo. A nomination a hnuhdawh lehna tura thil thlen dan pawh kan hre ve lo," a ti.

Kum 2018-a Nagaland assembly inthlanah khan chief minister Neiphiu Rio chu Northern Angami II consituency-ah chuhtu dang awm loin a lo tling tawh bawk a ni. Kum 1998 inthlanah khan, helpawl NSCN (IM) in inthlan an boycott avangin bial 43-a Congress candidate-te chu chuhtu awm loin an lo tling tawh bawk.

February 27-a inthlan neih tura nomination thehlutte tana inhnuhdawh hun a tawp hnuah, Kimini tello hian assembly bial 59-a inthlan neih tura chuh tum, candidate hi 183 an awm ta a ni. Nomination paper hi 225 thehluh a ni a, official-ten an endik hnuah 25 an hnawl a, 16 an inhnukdawk leh bawk

Candidate 183 zingah hian hmeichhia pali an tel. Political party 11 ten inthlan hi an chuh dawn a, BJP chuan candide 20 neiin, Communist Party of India (CPI)-in 1, Indian National Congress (INC) 23, Nationalist Congress Party (NCP) 12, National People's Party (NPP) 12, Nationalist Democratic Progressive Party (NDPP) 40, Naga People's Front (NPF) 22, Rising People's Party (RPP) 1, Janata Dal United (JDU) 7, Lok Janshakti Party (LJP) 15, Republican Party of India (RPI) 9, Rashtriya Janata Dal (RJD) 3 bakah independent candidate 19 an awm dawn a ni.