Meghalaya-ah 'My Vote, My Valentine' special musical campaign nei dawn

Meghalaya-a election official-te chuan vawiin, Valetine's Day hi state legislative assembly inthlan lo awm turah kum naupang zawk, millenial-te chu vote thlak tura sawmna remchang atan hman an tum.

Poll official chuan assembly inthlan hmasaa vote tlak ṭhat tawk lohna hmun, polling station 300-ah ṭhalaite hnenah vote thlak pawimawhzia inhrilhriatna ni pahin, 'My Vote, My Valentine' special musical campaign an nei dawn tih a sawi. He hunah hian tualchhunga musical band leh musicial troupe-te an ruai dawn.

Chief electoral officer, FR Kharkongor chuan Election Commission chuan vote thlak hunah pawh, polling station tinah vote thlak hmasa panga bakah, vote nei thar (first-time voter) vote thlak hmasa panga-te chu lawmman pek vek an ni dawn a ni, a ti.

Meghalaya assembly inthlan hi February 27 ah an nei dawn a ni.

CEO chuan an state-ah mipa aiin hmeichhiate vote nei an tam zawk a, a percentage-a chhut pawhin hmeichhe vote thlak a ṭha zawk ṭhin nia sawiin, official-te chuan tun ṭum inthlanah vote a tlak ṭhat theihna turin theihtawpin hma an la dawn tih a sawi. Meghalaya-ah hian vote nei mi 21,61,729 awmin, heng zinga 10,68,801 chu mipa niin, hmeichhia 10,92,326 an awm.