NJCF-in Kristiante nekchepna dem

Nagaland Joint Christian Forum(NJCF) chuan tun hnaia ram chhung leh hmarchhak, a bikin Assam-a sakhaw tlem zawk, Kristiante nekchep leh vauna awm ṭhin chu an dem thu an sawi.

Thuchhuah an siamah, NJCP vice president Rev Dr N Paphino chuan, sakhaw dangte thiltih dan inzahsakna awm loh chu a pawi a tih thu tarlangin, sakhaw dang huatna leh sawichhiatna thu sawi a nih fo laiin thuneitu lam an ngawi tlat chu a lungchhiathlak hle a ni, a ti. Assam Chief Minister-in thu a lo tiam tawhte chu, an state-a a kaihhruai sorkar hnuaia Kristiante tawrhna a thlen chuan awmze a nei lo a ni, a ti.

Rev Paphino chuan, sakhua chu politics khelhna atan hman a ni tiin, politics chu ram ṭhendarhna ni loin, ram pumkhatna tur atana hman zawk tur a ni, tiin a sawi. An state-in assembly inthlan an neih turah pawh mipuite chuan vauna leh nekchepna engmah awm loin vote an thlak thei tur a ni, tiin an tarlang.