Nagaland poll : Candidate zingah kum 50 hnuai lam 42.93% awm

Nagaland legislative assembly inthlan neih tura candidate 183 zingah kum 50 hnuai lam 79 (42.93%) an awm. Candidate-te kum hi chawhrualin kum 53.70 a ni.

Assembly constituency 60-a inthlan neih tura hian candidate 184 an awm a, mahse BJP candidate pakhat chu chuhtu awm loa a tlin nghal avangin candidate 183-ten inthlan hi an hmachhawn dawn.

Candidate naupang ber leh upa ber inthlauhna hi kum 60 a ni. Kum 50 hnuai lam 42.93% awmin an zingah hian kum 26 tling chiah mi pahnih an tel, kum 50-60 inkar 56 (30.43%) an awm a, kum 80 tling tawh mi pahnih an awm bawk. Candidate zinga kum 26 tling chiah mi pahnihte hi Indian National Congress (INC) candidate ve ve niin, Congress hian kum 40 hnuai lam candidate paruk an nei. Candidate upa ber chu Nationalist Democratic Progressive Party (NDPP) ticket-a ding, kum 86 mi Noke Wangnao a ni.

Party hrang hrang, candidate 10 chuang nei zingah Naga People's Front (NPF) candidate-te chu an kum chawhrualin an naupang ber. Candidate 22 neiin an kum chawhrual hi kum 50.58 an ni a, Congress party candidate-te kum chawhrual chu 51.3 niin, National People's Party (NPP) chu kum 52 leh BJP chu kum 54.2 a ni. Rorellai, NDPP candidate-te chu chawhrualin an upa ber a, kum 59.25 a ni.