Manipur CM-in Sikkim-a organic farming tour nei tur vailiam

Manipur chief minister N Biren Singh chuan Thawhṭanni khan ni 10 awha Sikkim-a organic farming education tour neih tur, 'OP Sadbhavana 2022-23' chu Imphal-a Mantripukhri aṭangin a vailiam.

Chief Minister chuan border area-a organic farming chawilarna kawnga Assam Rifles hmalakna chu fakin, "Ruihhlo do beihpui thlakna, 'War on Drugs' kalpui mekah pawh organic farming hi eizawnna thlakna tura thil pawimawh tak a ni. He huna telte hian state chhungah organic farming chawilarin, a hlawkzia pawh mipuite hnenah an zirtir thei dawn a ni," a ti.

Sikkim sorkarin Manipur loneitute tana organic farming zirchianna hun a lo buatsaih thei chu lawmawm a tih thu a sawi bawk. Loneitute hian Sikkim-a an cham chhung hian chemical-free organic farming chungchangte zirin, Sikkim sorkar hnuaia agriculture leh horticulture department huaihawtin organic farm hrang hrangte an lo tlawh bawk ang. Gangtok-ah Sikkim governor Ganga Prasad Chaurasia an hmu dawn bawk a ni.