Congress-in Meghalaya sorkar an chargsheet-na point 10 tlangzarh

Congress party chuan Meghalaya-a National People's Party (NPP) kaihhruai Meghalaya Democratic Alliance (MDA) sorkarin kum nga chhunga thil dik tawk lo tia an puhna point 10 an tlangzarh.

Thawhṭannia Shillong-a press conference an neihah, Congress party thupuangtu Pawan Khera chuan MDA sorkar chu Meghalaya rawktu lian tak a ni tiin, kum nga chhunga NPP kaihhruai sorkarin dik lo taka a thiltih leh eirukna a hluar dante chu ṭawngkam tlemtea sawi theih mai pawh a ni lo a ni, a ti.

MDA sorkar thil tih dik lo an tarlante chu - Assembly dome chim, Covid scam, MUDA scam, Coal scam, Saubhagya scam, Rice scam, Excise/Bond Cartelisation scam, Casino scam, Friends & Family – Government Contracts scam leh Police purchase scam-te a ni.

Khera chuan, "Point 10 chauh kan tarlang a, heng bakah hian MDA sorkar hnuaiah hian sum tihchingpen nasa takin a awm a, sawisen a ni lo," tiin a sawi zui. Assembly inthlan lo awm turah Congress party-in sorkarna an siam chuan an state rawktute chu thubuai siamsak an ni dawn a, an sum tihchingpente pawh hmuh let leh vek an tum dawn tih a sawi bawk.