Tripura : CPI-M team-in EC an hmu

Tripura legislative assembly inthlan neih tur atana inbuatsaih mek karah, eptu pawl Communist Party of India-Marxist (CPI-M) team chuan Thawhṭanni khan Election Commission hmuin, inthlan vuakvetah tharum thawhnate a thlen a hlauhthawnawm thu an sawi.

CPI-M palaite hi member pathum niin, an zingah hian politburo member Nilotpal Basu leh central secretariat member Muralidharan te an tel. Tun hnaiah state pawn lam aṭangin motorcycle tam tham tak lakluh a nih thu sawiin, heng motor cycle khalhtu gang-te chuan mipuite rikrapin, rorellai BJP chuan eptu party-te vauna atana an hman a hlauhthawnawm a, mipuite rilruah pawh hlauhna a siam a ni, an ti.

EC chuan CPI-M palaite nena inthlanna felfai leh dik, boruak muanawm tak hnuaiah neih a nih ngei theihna tura hmalak an lo tiam tih CPI-M palaite chuan an sawi.