Manipur-ah community transmission a thleng tawh : Speaker Khemchand
Manipur Legislative Assembly speaker Y Khemchand Singh chuan Covid-19 leng mek chu an state-ah pawh chuan vantlanga darh, community transmission a thleng tawh tih a sawi. Mahse hemi chungchang hi state sorkar erawh chuan a la puang lo.
Khemchand Singh chuan Pathiannia Imphal-a community quarantine centre kharna inkhawm hmannaah he thu hi hi a sawi chhuak a ni. Mipuite chu hri leng dona kawnga sorkar hmalakna ringawta in nghat lo a, mahnia theihtawp chhuah ṭheuh turin a chah nghal bawk.
"Thla thum liam ta aṭang khan state danga tangkhang mi tam tak an rawn haw khawm a, hri kai pawh tam takah pung chhoin, he hripui vanga thi pawh an awm chho ta zel a ni," tiin Singh chuan a sawi. State chhunga hri kai eng emaw zat, la test loh avanga hriat chhuah loh pawh an la awm nual a rin thu a sawi bawk a ni.
Covid-19 damdawi a la awm lo a, hei vang hian mipuite chuan hri kai lo tura fimkhur taka an awm a ngai a, hri do thei tura an taksa an tihchak pawh a ngai a ni, tiin Singh chuan a sawi. Manipur-ah hian Pathianni khan hripui vangin mi pakhat a thih belh leh a, coronavirus vanga thi hi pasarih an awm tawh a ni. Hri kai hmuh chhuah tawh hi 2,831 awmin, an zinga 1,737 chu enkawl dam an ni tawh. Hri leng vanga state puma total lockdown puan chu August 6 thleng atan pawhsei a ni tawh bawk.