Assam-ah MLA pasarihin Covid-19 kai

Assam Congress MLA Rakibul Hussain chu Pathianni khan Covid-19 a kai tih hriat a ni a, state MLA zinga hri kai hmuh chhuah pasarihna a ni. 

Rakibul Hussain chuan a Facebook-ah Covid-19 a kai thu hi sawi nghalin, a nuppui Nazreen Hussain pawhin a kai tih a sawi tel bawk. Hei vang hian ni liam ta chhunga anmahni nena inhnaiha awmte chu inkhung hrang a, an sample test tir turin a ngen. 

Pathianni khan Assam-ah hian hri kai hmuh chhuah belh mi 1,178 an awm a, an zinga 268 chu Guwahati-a mi an ni. Hri kai hmuh chhuah tawh hi mi 42,904 niin, 31,442 enkawl dam an ni tawh a, mi 105 in an thihpui tawh bawk. 

Health minister Himanta Biswa Sarma chuan hri kai hmuh belh zel ni mah se, an state chu India ram state zingah hripui thihpui, mortality rate hniam berna zingah a tel tih sawiin, mortality rate hi 0.24% a ni, a ti. Hri kai tawh dam leh, recovery rate pawhin hma a sawn zel a, Pathianni khan an state recovery rate chu 75% niin, recovery rate san lamah palina an nih thu a sawi bawk.