TIPRA chairman-in Tripura inthlan zawhah politics chawlhsan tum

Tipraha Indigenous Progressive Regional Alliance (TIPRA Motha) chairman Pradyot Kishore Manikya Debbarma chuan Tripura assembly inthlan zawhah politics chawlhsan a tum tih a sawi.

Tripura assembly inthlan hi vawiin hian neih a ni dawn a, March 2-ah result puan a ni ang.

Election campaign tawp ni, Thawhlehnia Charilam-a rally a neihah khan Tripura lal thlah, Tipra hotu chuan inthlan zawha politics a chawlhsan tur thu hi sawiin 'Bubagra' (king)anga vote a zawn ngai loh tur thu a sawi. Debbarma chuan hruaitu tamtak chuan mi rethei, ei tur leh chenna mumal nei lo a, zirna ṭha dawng thei lote dikna chanvo humhalhsak tura a beihna chu an hriatthiampui loh fo thu a sawi. "Vawiin hi political stage-a ka thusawi tawpna tur niin, inthlan zawh hnu aṭang chuan Bubgara angin vote ka zawng tawh ngai lo ang. In tan indona harsa leh hautak tak ka bei a ni," a ti.

Kum 44 mi Debbarma chuan, "March 2 hnuah chuan Bubgara chu politics lamah a awm zui tawh dawn lo a, mahse kan mite tan chuan ka awm reng ang. Mi rethei zawkten healthcare, education leh scholarship an hmuh theihna turin ka thawk zel ang," tiin a sawi. Politics chawlhsan mah se Greater Tripaland an phutna tihhlawhtlin a nih hma chuan a bei zel dawn a, electoral politics-a awm kher loin mipuite tan thawkin ráwng a bawlsak chhunzawm zel tur thu a sawi.