Assam sorkarin Sonitpur sanctuary-ah eviction drive kalpui

Assam sorkar chuan Thawhlehni aṭang khan Sonitpur district-a Burhachapori Wildlife Sanctuary-a dan kalha khawsate chhuahtir hna chu a thawk.

Sonitpur deputy commissioner Deba Kumar Mishra chuan, kum tam tak chhung chu forest area-ah hian dan kalhin mi tam tak an lo khawsa tawh tih sawiin, sorkar rama chengte chhuahtir hna kalpui mekah, he sanctuary-a dan loa awmte pawh chhuahtir tura hmalak tel a ni, a ti.

Mishra chuan, "Kan record-a a lan danin, forest area-ah hian chhungkaw 2,513 an khawsa a, an awmna hmun chhuahsan tur hian hriattirna pawh pek niin, a tam zawk chuan an chhuahsan tawh a ni," tiin a sawi. Sanctuary huam chhunga structure awmte tichhe turin Thawhlehni khan bulldozer, excavator leh tractor 100 vel tirh a ni a, buaina a chhuah palh venthawn thilah security mi leh sa pawh eng emaw zat dah an ni bawk.

Chief minister Himanta Biswa Sarma kaihhruai sorkar hian nikum May thlaa thuneihna an chan aṭang khan, state chhhung hmun hrang hrangah sorkar rama dan loa awmte chhuahtirna, eviction drive hi a kalpui a ni. Nikum December thla khan hmun hnihah eviction drive hi kalpuiin, kumin January thlaah ṭum khat a kalpui tawh bawk.

CM Sarma chuan eviction drive an neih chu eptu lamin sawisel mah se, sorkar ram leh forest area-te humhalh turin BJP-in sorkarna a chelh chhung chuan hma a la zel dawn tih a sawi.