AP-in BLS ambulance 5 lei thar

Arunachal Pradesh sorkar chuan health sector tan Basic Life Support (BLS) ambulance panga a lei thar. Health & family welfare minister Alo Libang chuan ambu­lance tharte hi Pathianni khan Naharlagun-a Directorate of health services aṭangin a vai liam. 

Minister chuan health depart­ment hman tura state sorkarin BLS ambulance panga a lei thar chuan  health infrastructure tihchakna tura theitawp a chhuah zia a tilang a ni, a ti. Sorkar laipuiin hmarchhak bial tana 'North East Special Infra­structure Development Scheme' (NESIDS) a siam chu lawmawm a tih thu sawiin, Libang chuan AP sorkar chuan NESIDS hnuaiah hian ambulance 25, BLS 20 telin a order tih a sawi. Sorkar chuan health sector chu a dah pawi­mawh hle a ni, tiin a sawi. BLS ambulance panga lei tharte hi Chimpu-a MLA apartment-a Covid Care Centre leh Midpu-a Covid hospital bakah, West Siang, Changlang leh Kurung Kumey district hospital-ah dah an ni dawn a ni.

 

AP-ah hian nimin khan Covid-19 kai hmuh chhuah belh mi 26 awm lehin, hri kai hmuh chhuah hi mi 1,698 an tling tawh a ni. Hri kai zinga pathumin an thihpui tawh a, mi 996 enkawl dam an ni tawh thung. Hri kai enkawl mek hi mi 699 an awm.