Tripura Legislative Assembly inthlan neih a ni

Tripura legislative assembly inthlan chu nimin khan neih a ni a, constituency 60-ah vote thlak a ni. Vote tla hi March 2-ah chhiarin result puan a ni ang.

Kum 30 chuang CPI-M in Tripura-ah sorkarna an chan hnuah, kum 2018-a inthlanah khan BJP chuan seat 36-ah hnehna changin, Left Front sorkar an paihthla a ni. BJP hian party malin sorkarna siam thei mah se, seat 8 latu regional party Indigenous Progressive Front of Tripura (IPFT) nen thawkdunin ṭangrual sorkar an siam zui a ni. Hemi ṭuma inthlanah hian CPI-M hian seat 16 lain, eptu party lian ber ni ṭhin Congress party erawh an artelukhawn thung.

Kumin inthlanah hian BJP chuan thuneihna chan chhunzawm leh ngei tumin ṭan an la hle a, central lama an hotu lian, prime minister Narendra Modi, union home minister Amit Shah, BJP national president JP Nadda leh union minister eng emaw zat an campaign a ni. CPI-M kaihhruai Left Front chu Congress party nen an thawkdun bawk a, Left Front hian seat 47-ah chuhin, Congress party in seat 13-ah an chuh thung.

Nimina inthlan neihah hian BJP thlawp misual ṭhenkhatin Dhanpur assembly constituency-a hmun eng emaw zatah Left Front polling agent-te beiin, voter ṭhenkhat chu an vote thlak tur dan an ni bawk niin, chief minister hlui leh CPI-M hruaitu Manik Sarkar chuan a sawi. BJP leh Left party worker-te intihbuainaah hliam tuar an awm bawk.

Vote thlakna tur polling station 3,337 siam niin, hengah hian inthlanna felfai taka kalpui a nih theihna atan web casting tih vek a ni.

Tripura hi kumina assembly inthlan nei hmasa ber niin, February 27 hian Nagaland leh Meghalaya pawh an inthlang ve leh ang. Nakkum Lok Sabha inthlanpui neih turah state dang pangain assembly inthlan hi an la hmachhawn dawn bawk a ni.