Nagaland 2023 : Candidate zingah crorepati 63% an awm

Nagaland legislative assembly inthlan neih tura candidate 184 zingah mi hausa tawntaw, crorepati mi 116 (63%) an awm.

Candidate zingah Lok Janshakti Party (Ram Vilas) candidate, Dr Sukhato A.Sema chu a hausa ber a, a thil neih hlut zawng hi Rs vbc 160 chuang hu a tling. A dawttu chu chief minister, National Democratic Progressive Party (NDPP) candidate Neiphiu Rio a ni a, a hausakna hi Rs vbc 46 hu a ni. Kum 2018 inthlanah khan candidate zingah crorepati hi 193 zingah 114 (59%) an lo awm tawh bawk.

Nagaland Election Watch leh Association for Democratic Reforms (ADR) chuan candidate-te affidavit zirchiangin report hi an tichhuak a ni.

Assembly bial 60 awmah bial pakhatah BJP candidate chu chuhtu awm loin a tling nghal a,bial 59-ah vote thlak a ni ang. Inthlan hi February 27-ah an nei dawn a ni. Candidate zingah national party candidate niin, state party-te aṭangin mi 72, registered unrecognised party aṭangin mi 25 leh independent candidate 19 an awm.

BJP candidate 20 zingah 18 (90%) thil neih hlut zawng chu Rs vbc 1 chuang hu niin, NDPP candidate 40 zinga 34 (85%) chu millionaire an ni bawk. Naga People Front (NPF) candidate 22 zinga 13 (59%) chu Rs vbc 1 chuang nei niin, JD(U) candidate 7 zinga 4 pawhin Rs vbc 1 chuang an nei bawk a ni. Congress party 23 zingah Rs vbc 1 chuang nei hi 6 (26%) an awm bawk a ni.

Inthlan neih tura candiate 184-te thil neih hi chawhrualin mi pakhatin Rs vbc 5.13 hu nei zel ang an ni.

Candidate zinga thubuai, criminal case nei hi 7 (4%) an awm a. Kum 2018 inthlanah khan criminal case nei hi 3 (2%) chauh an awm.

Zirna lamah candidate 184 zinga 49 (27%) chu Class 8-12 inkar niin, 128 (70%) chu graduate leh a aia sang an ni. Candidate pali chu diploma holder niin, ziak leh chhiar thiam tia inziak pakhat leh, ziak leh chhiar thiam lo pahnih an awm bawk.

Hmeichhia candidate an tlem hle a, mi pali chauh awmin 2% an ni. Kum 2018-ah pawh khan candidate 193 zingah hmeichhai panga (3%) chauh an awm a ni.