Meghalaya leh Nagaland-a BJP candidate 80 zingah Kristian 75 an awm

BJP national secretary co-incharge of Northeast, Rituraj Sinha chuan BJP chu huapzo party a ni tih sawiin, Kristian state pahnih - Meghalaya leh Nagaland-a assembly inthlan neih tura party candidate 80 an ruat zinga 75 chu Kristian an ni, a ti.

Meghalaya-ah hian BJP chuan assembly seat awm zawng zawng, seat 60-ah candidate a siam a, Nagaland-ah chuan an thawhpui National Democratic Progressive Party (NDPP) nena inremna an siam angin seat 20-ah candidate an nei thung. Nagaland-a BJP candidate ruat zingah hian hmeichhia pakhat a tel.

Nagaland-ah hian Kristian 85% chuang awmin, Meghalaya-ah 75% chuang an awm bawk. Sinha chuan BJP chu Hindu sakhua chauh thlawp nia ngaihna awm ṭhin chu a dik lo tih sawiin, huapzo tak niin sakhua dodal leh huat a nei lo tih a sawi. Ram dodaltute chauh chu an dodal a ni, a ti. Prime minister Narendra Modi kaihhruai sorkarin PRASAD (Pilgrimage Rejuvenation and Spiritual Augmentation Drive) scheme a kalpuina hnuaiah, Hindu temple leh Hindu corridor-te chauh siam a ni lo a, sakhaw dang hmun pawimawhte thuam ṭhat niin heng zingah hian Kristian-te biakin leh institution-te pawh a tel a ni, a ti.

BJP hruaitu Sinha chuan state pahniha an candidate 75-te chu Kristian an ni a, a bak mi panga pawh Hindu an ni lo tih a sawi bawk.