Tripura assembly inthlanah vote 81.10% a tla; EC-in Congress leh BJP hnenah notice a pe

Tripura legislative assembly inthlan chu Ningani, February 16 khan neih a ni a, vote nei mi nuai 28 chuang awmah vote 81.10% a tla. Assembly constituency 60-a inthlan neihah hian candidate 259 an awm.

Kumin inthlan hi assembly inthlan hmasa ṭum thum aiin vote a tla chhe zawk a ni. Kum 2018 assembly inthlanah khan vote 89% a tla a, hemi hma ṭum hnih inthlanah vote tla hi 91% an tling ve ve bawk.

Chief electoral officer Gitte Kirankumar Dinakarro chuan hmun kilkhawr zawka vote tla report nghah mekte a la awm avangin, vote tla zat pawh hi a la san chhoh deuh a beisei thu nimin khan a sawi.

Vote thlakna tur polling station 3,337 awmin, heng zinga 1,100 chu 'sensitive' category-ah dah an ni a, 28 chu 'critical' category-a dah an ni bawk. Hmeichhe hlang enkawl polling station 97 siam a ni. Polling station hrang hrangah hian venhim hna thawktu, security force mi 31,000 duty tir an ni.

Tun ṭum inthlanah hian a ṭum khatna atan Election Commission chuan kum 80 chung lam leh, persons with disabilities (PwD) voter-te chu in aṭanga vote an thlak theihna tur a ruahman sak.

Chief electoral officer (CEO) Gitte Kirankumar Dinkarrao chuan vote thlak nia Tripura-a Congress leh BJP unit-ten twitter kaltlanga an party vote tura mipuite sawmna an tihchhuah avangin Ningani vek khan notice a pe nghal. Election Commission chuan party pahnihte tweet chu 'silence period' huam chhunga tihchhuah a nih avangin election law kalh a ni, a ti. Dan an bawhchhiat chungchanga insawifiah turin nimin tlai dar 5 thleng kha hun pek an ni.

Inthlan ni bikah hian hmun hrang hrangah buaina tenau chhuak report a awm a; Gomati, Sepahijala, South Tripura leh West Tripura district-ah rorellai, BJP worker-ten an beih avangin eptu party worker 60 velin hliam an tuar nia sawi a ni. CPI-M chuan BJP worker-te chuan polling station 25 chuangah CPI-M candidate-te polling agent-te beiin kutte an thlak tih an sawi.

Hetih lai hian CEO chuan buaina chhuahna hmun report an dawn apiangin, security force-te tirh nghal zel niin, anni hian buaina awmte pawh an chingfel nghal zel a ni, a ti.

Gomali district-ah police constable pakhat chu BJP vote turin vote thlak tura kalte a lo hrilh nia sawi a nih avangin suspend nghal a ni bawk.

Tripura assembly inthlanah hian rorellai BJP leh IPFT thawkdun, Left-Congress ṭangrual leh regional party ṭhangduang chho mek, Tipra Motha-te chu an inbei ber a ni.