Itanagar buaina: Mi 10-in hliam an tuar; Internet service titawp

Arunachal Pradesh khawpui, Itanagar-ah nimin khan Arunachal Pradesh Public Service Commission (APPSC) examination question paper leak chungchang duh lohna lantirnaah, nawrh huaihawtte leh security force-te inkara buaina chhuak vangin mi 10 an hliam. Nizan dar 6 aṭang khan February 19 tlai dar 5 thleng Itanagar leh a chehvelah internet tihtawp a ni.

State sorkar chuan buaina chhuak vang hian State Public Service Commission member thar lakluh tur pawh a ṭhulh nghal bawk.

Pan Arunachal Join Steering Committee ( PAJSC ) hmingin nimina nawrh hi huaihawt a ni. Sorkarin khawpui chhungah punkhawp khapna thupek tichhuak mah se, ṭhalai tam tak chhuak khawmin, sorkar an demna thute an aupui a ni.

Pungkhawm zinga ṭhenkhat chuan motorcycle leh four-wheeler pakhat halin, bungruate an tichhia a, security force duty-te chu lungin an tawng bawk a, hei vang hian security force-te nen hian innawr zuiin buaina a chhuak zui ta niin IGP (Law & Order) Chukhu Apa chuan a sawi.

APPSC paper leak chhui hna hi Central Bureau of Investigation (CBI) kutah hlan a ni tawh a, nikum December thla khan he thila inhnamhnawiha puh mi pariat lakah CBI chuan chargesheet a lo ziaklut tawh a ni.