AP sorkarin PAJSC thilphut ngaihtuah a remti Itanagar-ah bandh titawp nghal

Arunachal Pradesh sorkar chuan Arunachal Pradesh Public Service Commission (APPSC) examination paper leak chungchanga nawrh huaihawttu, Pan Arunachal Joint Steering Committee (PAJSC)-te thil phut 13 chu ngaihtuah a remtih hnuah, nimin khan state khawpui Itanagar-a bandh huaihawt chu tihtawp zui a ni ve nghal.

PAJSC-te hian kar liam ta Zirtawpni aṭang khan APPSC-a dik lo taka thiltitute chunga action lak a nih loh avangin lungawi lohna an lantir a, nawrh hauihawtnaa security force-te nena innawr buainaah mi 10 in hliam an tuar a ni. Inrinni khan nawrh hi an huaihawt chhunzawm leh bawk. Nawrh huaihawt vang hian Inrinnia Class 5, 7, leh 11 board exam pawh ṭhulh a ni.

Ni hnih nawrh huaihawt a nih hnuah, Inrinni zan khan state sorkar, PAJSC, All Nyishi Students Union (ANSU), Nari Shakti aiawhte leh activist Sol Dodum-te chuan inbiakna neiin, zan rei tak hnuah inremna an siam thei ta a ni. Meeting-ah hian chief minister Pema Khandu, home minister Bamang Felix, water resource development minister Mama Natung-te pawh an tel.

State sorkar chuan PAJSC-te thil phut hrang hrang 13-te chu ngaihtuah a remtih thu a sawi hnuah nimin aṭang khan bandh hi an titawp ta a ni. An thil phut zingah hian kum 2012-2014 chhunga paper leak chungchagna chhuitu tur, kar khat chhung ngeia Supreme Court emaw, High Court emaw judge hlui kaihhruai high-level din tura sorkar laipui hnenah ngenna thlenin, candidate-te harsatna tawh buaipui zui tura standing grievance redressal committee dinte a tel a ni.