Child marriage laka beihpui thlakna thla ruk danah neih zel a ni ang : Assam CM

Assam chief minister Himanta Biswa Sarma chuan kum tling loa inneih, child marriage tihtawp tuma hma an lak meknaah, thla ruk danah Assam police-te chuan state chhung hmun hrang hrangah enfiah hna an thawk ṭhin dawn a ni, a ti.

Chief Minister chuan child marriage tihtawp tumin sorkar chuan theihtawp a chhuah zel dawn tih a sawi. Hemi kaihhnawihah hian sorkar chuan call centre-te siamin, mipuite zirtirna te a pe ang. Child marriage chungchanga complaint thehlut duh tan pawh centre-ah hian an thehlut thei dawn a ni. Kum 2026-ah chuan an state-a child marriage thleng ṭhin chu sorkarin tihtawp vek a tum tih CM chuan a sawi.

State sorkar hian February 3 aṭang khan kum tling loa inneite dapchhuah hna hi a kalpui ṭan a, mi 3,000 chuang man tawhin, an mi mante dahna tur hian temporary jail-te siam a ni. An man zinga a tam zawk hi an nupuite kum tling lo niin, chhungkaw pa ber leh eizawngtu berte man an nih avangin an nupui fanaute pawhin lungawi lohnate an lantir a ni. Eptu party-te pawhin sorkar thiltih dan, chhungkaw pa ber man an ni chu sawiselin, dan palzutah an puh a, police-te pawh mipuite rikrapah an puh bawk.

Association for Protection of Civil Rights (APCR) chuan Assam sorkar chu state chhunga minority community te tihlauthawng leh ralṭi taka siamah a puh.APCR fact finding team member, advocate Tamman Pankaj chuan Assam police-te chuan inkaihhruana siamte chu palzutin, mi inah lut luiin an va man a ni, a ti.