Meghalaya sorkarin PM election rally neih tumna hmun hman remti lo

Meghalaya-a sports department chuan BJP-in chief minister Conrad K Sangma dinna bial, South Tura-a prime minister Narendra Modi election rally neihna atan stadium hman an tum chu a remti lo.

Sports department chuan PM rally neih tumna hmun, PAS Sangma Stadium hi chei mek a la ni a, hmanruate la chhekkhawm a nih avangin mi tam tak punkhawmna atana hman chu a him lo niin an sawi. Hei vang hian Alotgre cricket stadium-ah rally neih dan tur ngaihtuah a ni tih district electoral officer Swapnil Tembe chuan a sawi.

PM Modi-a rally neih tumna stadium hi Rs vbc 127 senga sak niin, nikum December 16 khan Chief Minister chuan a hawng a ni. Mahse he stadium chei hna hi la thawh chhunzawm a nih avangin, sorkar lam chuan rally neih chu mipui tan a him tawk lo niin a sawi. Hetih lai hian BJP chuan sorkar thiltih dan chu sawisel nghalin, stadium hawn a nih aṭanga thla hnih a nih tawh hnua punkhawmna atana hman a him lo nia sawi chu thil nuihzathtlak tak a ni, an ti ve thung. Conrad Sangma chuan BJP chu hlauh leh, BJP thli tleh mek chu dan a tum a ni tiin BJP national general secretary Rituraj Sinha chuan a sawi a, mahse PM rally neih tur chu dan tum mah se, state mipui chuan BJP thlawp turin an rilru an siamfel vek tawh a ni, a ti. Assembly inthlan neih tur BJP hruaitu Amit Shah leh an star campaigner dangte rally neihah mipui an tel ṭhat theih avangin party dangte a ti hlauthawng tawh niin a sawi bawk. Rorellai, National People's Party (NPP) chauh ni lo, Trinamool Congress leh eptu party dang pawhin BJP dan tumin theihtawp an chhuah mek niin an puh.

State BJP hruaitu, AL Hek chuan prime minister Modi hian February 24 hian Shillong-a Pynthorumkhrah constituency-ah roadshow a nei dawn tih a sawi.