Manipur-ah ruihhlo Rs vbc 8.42 hu an man

Manipur police leh Assam Rifles sipaiten Manipur chhim lam, Myanmar ramri bulah ruihhlo, brown sugar kg 3.710 leh opium kg 20 an man a, an ruihhlo man hi international market-ah cheng vaibelchhe 8.42 man an ni.

Thu an dawn bawhzuiin, AR leh Manipur police joint team hian Tengnoupal district-a Chamol khaw bulah motor an endik aṭangin brown sugar hi sahbawn bawm 88-ah an thuhruk an man a ni. Ruihhlo neitu, Moreh lam mi an man bawk a, Tengnoupal police station-ah an hlan nghal.

Chandel district-a Songkhom khuaah Mobile Vehicle Check Post-ah opium kg 20 an man bawk a, ruihhlo leh a neitu hi Chakpikarong police station-ah an hlan nghal bawk a ni.