Meghalaya : Heart attack vangin UDP candidate a thi

Meghalaya legislative assembly inthlan neih tura United Democratic Party (UDP) candidate, home minister hlui HDR Lyngdoh chu Thawhṭanni khan a campaign laiin heart attack a nei a, damdawiin panpui a nih hnuah a thi.

Kum 66 mi, Maheh tia hriat lar Lyngdoh hi East Khasi Hills-a Sohiong assembly constituency-a UDP candidate a ni. Sorkar hmasa, Congress kaihhruai sorkarah khan Home Minister a ni ṭhin. Kum 2018 inthlanah khan Sohiang bialah Congress ticket-in a ding a, mahse a tling zo lo. Kumina assembly inthlan neih tur puan a nih hma lawk khan UDP a zawm a, UDP candidate atan ruat a ni zui a ni.

February 27-a assembly inthlan neih tur atan campaign-a meeting an neih laiin Lyngdoh hian heart attack neiin, Shillong-a Bethany hospital panpui a nih hnuin a thi a ni.

Chief electoral officer FR Kharkongor chuan, Sohiong-a UDP candidate a thih vangin he bial bika inthlan hun tur sawn a nih thu a sawi a, February 27-ah assembly bial 60 zinga 59-ah vote thlak a ni ang a, Sohiong biala vote thlak hun tur chu Election Commission of India-in a hun a la rawn ruat ṭha leh dawn tih a sawi.

UDP leh political party dangte chuan Lyngdoh an ui thu leh,a chhungte an tawrhpui thu an sawi. Chief minister Conrad K Sangma chuan home minister hlui, HRD Lyngdoh chu kawng hrang hranga an state tan thawktu, mipuite tana inpe tak an nih thu sawiin, a thihna chu Meghalaya tan channa nasa tak a ni, a ti.