Meghalaya : Pathian hla kaihlek vangin NPP hruaitu lakah FIR thehlut

Meghalaya-a Williamnagar-a National People's Party (NPP) hruaitu pakhat chu Kristian-te Pathian biakna hla kaihlek, 'Jesus' tih chu 'NPP' tia thlak a, social media lama a tihdarh avangin a lakah FIR thehluh a ni.

FIR hi South Tura-a UDA candidate, John Leslee K Sangma-a'n Tura police station-ah Thawhṭanni khan a thehlut.

Williamnagar-a NPP general secretary, Georgeman Mark chuan 'I have decided to follow Jesus' tih hla chu kaihlekin, 'Jesus' tih aiah 'NPP' tia thlaka midang panga nen an sakna video chu social media-ah upload a ni.

John Leslee Sangma chuan, "He hla hi Kristiante tana hla pawimawh, Isua Krista kan rinna leh Kristian nun dan kan zawmna; kan tihnghehna hla a ni. Mahse NPP hruaitu leh midang pangate hian Isua hming chu thlakin, an party leh hruaitu chief minister Conrad Sangma chawimawina hla atan an rawn hmang a ni," tiin, an thiltih dan chu Kristiante leh an rinna hmusitna a ni, a ti. UDP candidate chuan hetianga sakhaw hla pawimawh sawisatu leh, he thila inhnamhnawihte chu IPC Section 295 hnuaiah hrem theih a ni tih sawiin, an chunga action lak ngei a phut tih a sawi.