Sikkim : CM-in Health Minister hlui MLA a nihna aṭanga bang turin ti

Sikkim chief minister Prem Singh Golay chuan health minister a nihna aṭanga bang, MK Sharma chu Singtam Khamdong bial MLA a nihna aṭang pawha bang turin a ti.

Supreme Court-in Sikkimese Nepali-te 'immigrant' tia a sawi chungchangah lungawi loin, Sharma hi February 2 khan Health Minister a nihna aṭangin a bang a ni. Mahse MLA a nihna aṭang erawh chuan a bang tel lo thung.

Thawhṭannia rorellai, Sikkim Krantikari Morch (SKM) party-in Vijay Diwas hun an hmanaah, CM Golay chuan Sharma chu minister a nihna aṭanga a ban hnuah, Delhi lamah CM nih tuma hma laah a puh. "CM ni thei tura a inngai a nih chuan, SKM MLA a nihna aṭangin a bang hmasa phawt tur a ni. Poltical party dang hming emaw, independent emawin inthlan a chuh phawt a ngai ang. By-election neih a ngai dawn a nih chuan, Sharma khing tur hian candidate ṭhalai tak ka dah ngei ang," tiin a sawi.

CM chuan MK Sharma chu bei zuiin, kum 2020-ah SKM party MLA pakhat Bishnu Kumar Khatiwara chu party chhuahsana CM dodal turin a thlem a, mahse Bishnu zawk hian ama hnenah engkim a report ta zawk niin a sawi. Hei vang hian an party pawhin ngaidamin, a chungah pawh action an lak loh thu a sawi bawk.

Chief Minister chuan Sikkimese Nepali-te 'immigrant' tia a sawina chu an dodal hnuah, Supreme Court pawhin a sut leh tih sawiin, February 8 chu immigrant tag laka hnehna an channa niah kumtinin an hmang tawh dawn tih a sawi a ni.