PM rally dilna hnawlsak chungchangah ka inhnamhnawih lo : Meghalaya CM

Meghalaya chief minister Conrad K Sangma chuan state legislative assembly inthlan neih tur atana prime minister Narenrdra Modi-a'n BJP tan a campaign, Tura-a election rally neih a tumna hmun hman phalsak a nih loh chungchangah inrawlhna a neih loh thu a sawi.

BJP chuan February 24-ah Tura-a PA Sangma Sports Complex-ah PM election rally hi buatsaih an tum a, mahse state sports department chuan he stadium hi chei mek a la nih bakah, hmanrua dahkhawm eng emaw zat a la awm avangin, mi tam tak punkhawmna atan a him lo palh thei tiin, rally neih dilna hi a hnawlsak a ni.

Stadium hman dilna hnawlsak an nih chungchangah BJP chuan rorellai, National People's Party (NPP) leh CM Sangma chu na taka bei zuiin, an state-a BJP thli tleh mek chu dan tuma theihtawp chhuahah an puh.

BJP puhna hi CM chuan chhangin, inthlan kaihhnawiha rally neih tur reng renga phalna chu Election Commission leh district thuneitute pek a ni tih sawiin, amah leh an party-in inhnamhnawihna an nei lo tih a sawi. "Permission of Election Commission of India lam aṭanga pek zel an ni. NPP leh keiin sawi engmah kan nei lo a, he thila kan hming an hnuklut lui hi thil dik lo tak a ni. Kei ngei pawh rally ka neih tumna eng emaw zatah permission min pe thei lo a ni," a ti. Hetiang chu inthlan dawna thil thleng fo a ni a, BJP chuan a hluhlang zawnga thil laa vawrh darhah a puh a ni.

BJP-in stadium hawnnan thla hnih a nih hnuah, a chei leh siamṭhat chhuanlam la hmanga an puhna pawh chhangin, Sangma chuan stadium hi hmun hniha ṭhenin, football stadium awmna zawk chu hawn a ni tawh a, a pakhat zawk - indoor stadium leh swimming pool awmna lam erawh chu peihfel a la ni chiah lo a, hemi chungchang pawh chiang taka tarlan a nih thu a sawi bawk.

West Garo Hills district electoral officer, Swapnil Tembe pawhin stadium-ah hian hna ṭhenkhat thawh a la nih bakah, hmanruate dahkhawm a nih avangin mipuite himna venthawn thilah he hmuna punkhawmna lian tham buatsaih chu a rem lo tih sawiin, rally neihna tur hmun dang hi ngaihtuah mek a nih thu a lo sawi tawh bawk a ni.