Ganga Vilas-in Guwahati a thleng

Khawvela river cruise thui ber, Ganga Vilas chuan Varanasi, Uttar Pradesh aṭanga a chhuah aṭanga ni 48 hnu, Thawhṭanni khan Assam state khawpui, Guwahati chu Swiss khualzin 28-te nen an thleng. Thawhlehni khan khualzinte hian Kamakhya temple leh Assam State Museum-te an tlawh nghal a ni.

Additional chief secretary Maninder Singh, Kamrup Metro deputy commissioner Pallav Gopal Jha leh IWAI regional director A Selvakumar leh official dangte chuan khualzinte hi an lo dawngsawng a, an puala hun buatsaihah Karbi leh Tiwa hnamte'n an hnam lam an entir.

Guwahati aṭang hian Thawhlehni tlai khan Ganga Vilas hi Mayong, Morigaon district lam panin a chhuak leh nghal a, an zinkawng hi March 1-a Bogibeel, Dibrugarh district an thlen hunah a zo dawn a ni.