President-in AP Legislative Assembly special session hmanpui

Ni hnih chama Arunachal Pradesh state tlawha zin, president Droupadi Murmu chuan Thawhlehni khan Arunachal Pradesh legislative assembly special session hmanpuiin thu a sawi.

President Murmu chuan AP chu India ram peng pawimawh tak, Act East Policy-a stakeholder lian tak a nih thu a sawi. AP leh hmarchhak bialte chu hun rei tak ngaihsak loa awmin, inkalpawhna ṭhat tawk loh avangin economy lam thlengin an tuar a, mahse tunah sorkar laipuiin a ngaihsakin bial hmasawnna tur a dah pawimawh tawh a ni, a ti. Arunchal Pradesh-ah chuah hmasawnna kawl a eng chho mek a ni, tiin a sawi.

Arunachal Pradesh-ah hian self-governance leh grassroot democracy chu kum tam tak kalpui a ni tawh tih President chuan a sawi a, state mipuite pawh theihtawpa sorkar hmalakna hrang hrangte ṭawiawmin, democrary-a rinna an nghah ngam zia an tilang a ni, tiin a sawi. Assembly member-te chu an laka mipuite beiseina an neih ang ngeiin, state hmasawnna leh mipuite rawngbawlsak tura theihtawp chhuah zel turin a chah bawk.

President chuan Aruanchal Pradesh assembly-in Digital India program hnuaia paperless, 'e-Vidhan' a kalpui chu fakawm a tih thu sawiin, state sorkarin ‘Year of E-Governance’ atan kum 2022 a puang leh, e-governance project eng emaw zat a kalpui mek chu lawmawm a tih thu a sawi. Heng project-te hian administrative reform bakah, mi nawlpui tan pawh khawsak a tihawlsam phah dawn a ni, a ti.