Nagaland : Buaina chhuak vangin constituency 2-ah CrPC 144 puang

Legislative assembly inthlan nei tura inbuatsaih mek, Nagaland-a Wokha district-ah Ningani khan buaina a chhuak a, hei vang hian district chhunga assembly constituency pahnihah mi panga aia tam punkhawm khapna, CrPC Section 144 chu March 3 thleng atan puan a ni.

Buaina hi Nationalist Congress Party (NCP) leh BJP party worker-te inkara chhuak a ni a, boruak muanawm tichhe zawng leh, mipuite himna tiderthawng zawnga chetna thleng vang hian Wokha district deputy commissioner, Ajit Kumar Ranjan chuan 37-Tyui leh 38-Wokha assembly constituency-ah CrPC section 144 hi a puang zui nghal a ni.

CrPC of 1973, Section 144 hnuaiah hian mi panga leh a aia tam punkhawm khap a ni a, hei bakah hian zan dar 9 aṭanga a tuk zing dar 5 thleng essential service ni lo motor tlanchhuah khap a ni bawk. Mahse he khapna hian medical lam mi, election duty leh essential service-te a huam lo a, press & media, telecom service te a huam lo bawk.