AP-a paper leak kaihhnawihah hrem mek under-secretary ruang hmuh a ni

Arunachal Pradesh Public Service Commission (APPSC) examination paper leak kaihhnawiha official suspend mek zinga mi, under-secretary Tumi Gangkak (42) chu kar liam ta Zirtawpni khan Itangar-a Ganga Lake area bul, Jote-Poma road-ah a ruang chhar a ni.

West Siang district mi, Gangkak APPSC paper leak chhuina kal mekah a hna aṭang hian suspend a ni a, Ningani khan CBI chuan thu zawhfiah turin an office-ah pawh an ko nia sawi a ni.

City SP Jimmy Chiram chuan Gangkak thih chhan tak hi hriatchian la ni lo mah se, a thih danah thil dik tawk lo awma a lan avangin thubuai pawh ziahluh a ni tawh a ni, a ti. Post-mortem neih hnuah chanchin chiang zawk an hriat theih a beisei thu a sawi bawk. Vawiinah post-mortem report hi a chhuak ang.

Chiram chuan Gangkak chhungte hnenah a hmain vauna te a lo tawk a nih chuan police-ah complaint thehlut turin a hrilh bawk. An chhungkaw WhatsApp group-a Gangkak-a message thawn, social media lama darh zuite pawh chu police-te chuan an ngaihven thu a sawi. Gangkak hian, "APPSC paper leak-ah khan inhnamhnawihna engmah ka nei lo. Tih dik lo ka nei lo a, mahse Asst Controller of Examinations ka nih avangin an target zingah ka tel a ni," tiin a ziak.

Police-ten an tarlan danin, CBI hian Ningani chawhnu dar 3.30-ah Gangkak hi an office-ah an ko a, tlai 4:30-ah a chin hriat loha awmin, a phone a in off zui nghal a ni. Mahse WhatsApp-ah a message thawnchhuah hnuhnung ber hi tlai dar 4.48-ah thawn a ni thung. Zirtawpni chawhnu dar 1 vel khan a ruang hi hmuh a ni a, mau hmunah a ruang hi a lo inkhai a, a inawkhlum nge, midang kuta thi tih hriatchian a la ni lo.