Manipur-in border area-ah police outpost 34 siam dawn

Manipur chief minister N Biren Singh chuan, 12th Manipur Legislative Assembly session neih mekah, state sorkar chuan border area-ah police outpost 34 a siam dawn tih a sawi.

House leader Singh chuan Zirtawpni liam taa session neihah, ministry of home affairs remtihpuinain ram dang aṭanga dan loa rawn lut ṭhinte venna turin police outpost hi siam a ni dawn tih a sawi.

Singh chuan kum 2012, January 1 aṭang khan dan loa lut, Myanmar mi 393 man an nih tawh thu leh, heng zinga pakhat chu an ramah thawn kirin, mi 107 chu judicial custody-ah dah an ni a, detention centre-ah mi 105 awmin, mi dang 180 chu bail-a chhuahtir an nih thu a sawi bawk.

Dan loa ram dang aṭanga rawn lutte venna leh dapchhuahna tura state sorkarin hma a lak dan hrang hrangte pawh sawilangin, biometric surveillance, house-to-house Aadhaar verification, security alert leh thil dang dang an kalpui dante a sawi.