EC-in Tripura-ah booth-level peace meeting buatsaih

Election Commission chuan Tripura inthlana vote tla chhiar ni leh a hnu zelah thil duhawm lo a thlen lohna turin, vote chhiar hmain booth-level peace meeting a buatsaih. Meeting hi nimin khan neih ṭan niin, vawiinah pawh chhunzawm leh a ni ang.

Tripura assembly member 60 thlannaa vote tlate chu March 2 hian hmun 21-ah chhiar a ni ang.

Chief electoral officer (CEO) Gitte Kirankumar Dinakarrao chuan, "February 16 khan boruak ṭha tak hnuaia inthlan kan lo nei thei tawh a, vote tla pawh a ṭha hle. Tuna kan hmabak leh chu vote chhiar nia boruak ṭha leh muanawm a awmna tura hma lak a ni," tiin chanchinbu mite a kawmnaah a sawi.

Dinakarrao chuan meeting-ah hian political party zawng zawng aiawhte bakah mipuite pawh tel turin a sawm. "Political party-te chu result puan hunah, eng result pawh ni se an inthunun theih a ngai dawn a ni," tiin buaina siam lo tura an ngenna pawh a hlawhtlin ngei a beisei thu a sawi. An state boruak chu a ṭha rih hle tih sawiin, vote chhiar niah pawh counting hall tinte chu thuah thuma ven vek an ni dawn a ni, a ti. 'State police-ten a hmasa berah vengin, Tripura State Rifles (TRS) ten an veng leh ang a, final layer-ah central force dah an ni ang. Counting hall chhungah CCTV dah vek a ni bawk ang," a ti.

Election Commission of India chuan constituency tin atan counting observer pakhat zel a lo ruat tawh a, heng bakah hian micro observer-te pawh an awm dawn bawk.

February 16-a vote thlak a nih hnuah, inthlan kaihhawihah buaina chhuakah mi 21 man an ni tawh a ni

Tripura assembly inthlanah khan vote 89.95% a tla a ni. Inthlana vote tlate hi Meghalaya leh Nagaland state-te nen a rualin March 2-ah chhiar a ni ang.