Meghalaya leh Nagaland assembly inthlan tluang taka neih a ni

Meghalaya leh Nagaland legislative assembly inthlan chu February 27 khan tluang taka neih a ni a, Meghalaya-ah vote 85% chuang leh, Nagaland-ah 83% chuang a tla.

Meghalaya

Chief electoral officer FR Kharkongor chuan vote nei mi nuai 21.6 aṭangin vote thlak hi 85.17% an awm tih sawiin, inthlanna hi boruak muanawm tak hnuaiah neih a ni, a ti. Hmun kilkhawr zawk report-te dawn kim vek a la nih loh avangin, vote tla zat pawh hi a la san chhoh leh deuh a rinawm thu a sawi bawk.

Meghalaya-ah hian assembly constituency 60 a awm a, mahse Sohiong constituency-a candidate pakhat a thih avangin he bialah hian inthlan neih a ni ve lo a, bial 59-ah vote thlak a ni. Candidate 375 an awm a, an zingah hian hmeichhia 36 an tel.

CEO chuan vote thlak ni hian polling booth tlem a zawngah vote thlakna, electronic voting machine (EVM) fel tawk lo report a awm a, mahse a hnuah siamṭhat leh nghal an ni, a ti.

Polling station 3,419-ah vote thlak niin, heng zinga 640 chu 'vulnerable' leh 323 chu 'critical' category-ah dah an ni. Inthlanna felfai leh boruak ṭha a awm theihna atan inthlan buaipuitu mi 19,000 chuang bakah, venhimna hna thawk turin central armed police force (CAPF) company 119 -te duty tir an ni a, state police-te an duty bawk.

Nagaland

Nagaland chief electoral officer V Shashank Shekhar chuan vote nei mi nuai 13 awmin, vote tla hi 84.69% a tling tih a sawi. Inbiakpawhna lamah harsatna a awm vangin data ṭhenkhat an la dawng kim lo a, dawn kim hunah chuan vote tla zat pawh a la pung thei dawn niin a sawi.

Assembly constituency 60 a awm a, mahse Zunbehoti district-a Akuluto bialah BJP candidate Kazheto Kinimi chu chuhtu dang awm loh vangin a tling nghal a, hei vang hian bial 59-ah vote thlak a ni. Candidate 184 an awm a, candidate zingah hmeichhia pali an tel.

CEO chuan constituency pathumah buaina chhuak a awm tih loh chu, hmun dangah inthlan hi boruak muanawm tak hnuaiah neih a ni, a ti.

Pughoboto bial chu vote tla ṭhatna ber niin, 92.11% a tla, Tseminyu bialah 91.88% leh Mon-ah 90.67% vote a tla bawk a ni.

Vote thlakna polling station 2,291 awmin, heng zingah 196 chu hmeichhe hlangin an enkawl niin, people with disabilities enkawl polling station 10 a awm bawk.

Inthlan ni hian police-ten hmun hrang hrangah pawisa fai, Rs 1,99,350 an man, Mode Code of Conduct (MCC) hman a nih hnua an thil man hi Rs 35,79,49,059 hu a tling.

Exit poll :
Tripura leh Nagaland-ah BJP an chak ring, Meghalaya-ah NPP in seat la hnem ber dawn

Hmarchhak state pathuma assembly inthlan neihna - Tripura, Meghalaya leh Nagaland-a NDTV-in Poll of Polls a siamah, Tripura leh Nagaland-ah chuan BJP an chak rin a ni a, Meghalaya-ah chuan rorellai National People's Party (NPP) chu seat la hnem ber tura rin ni mah se, party mala sorkarna siam thei an awm dawn lo niin a tarlang.

Exit poll hrang hrangte a lakkhawm aṭanga NDTV-in Poll of Polls a siamah hian, Tripura-ah rorellai BJP chuan eptu, Congress-Left ṭangrual leh regional party TIPRA Motha chu a hneh leh dawn. BJP hian assembly seat 60-ah seat 35 vel a la pha dawn a, party malin sorkarna a siam thei dawn nia chhut a ni. Congress-Left ṭangrual chuan seat 12 vel an lak phak chauh rin a ni bawk.

Meghalaya-ah rorellai, chief minister Conrad Sangma kaihhruai NPP chu seat la hnem ber tura rin niin, assembly seat 60-ah seat 22 vel la pha tura chhut a ni a, party malin sorkarna a siam pha dawn lo nia sawi a ni. BJP chuan Meghalaya-ah hian hma rawn sawn chhoin, MLA pahnih chauh a neih chu tun ṭum inthlanah parukah a nei pung dawn nia chhut a ni bawk. BJP hi NPP kaihhruai ṭangrual sorkarah tel mah se, tun ṭum inthlanah chuan party malin a ding thung. Trinamool Congress (TMC) chuan seat 11 an lak phak rin a ni bawk.

Nagaland-ah rorellai, BJP-Nationalist Democratic Progressive Party (NDPP) ṭangrual chu hneh takin an tling leh dawn nia chhutin, assembly seat 60-ah seat 42 zet an lak phak rin a ni. Inthlanah BJP hian seat 20-ah chuhin, NDPP hian seat 40-ah an chuh a ni.