FM Sitharaman-in Sikkim-ah budget outreach program hmang

Union finance minister Nirmala Sithararam-i chuan post-Financial Budget Outreach program for 2023 hmangin Sikkim a tlawh.

Finance Minister hian Thawhṭanni khan Sikkim hi a thleng a, Gangtok-a Chintan Bhawan-ah stakeholder, officer, chambers of commerce, self help group leh entrepreneur-te meeting a neihpui nghal. Chanchinbu mite a kawm zui nghal bawk.

Sikkim-a budget outreach program neih a nih chungchang hi sawiin, Finance Minister chuan, "Kum 4-5 liam ta aṭang khan, union budget pharh hnuah ministry zawng zawng chu ram chhunga khawpui hrang hrangah kalin, stakeholder, officer, chamber of commerce, SHG leh a dangte chu budget-a an chanpual chungchangte hrilhfiah leh, hriat an duhte hrilhfiah turin an kalkual ṭhin. Anni pawh hian an ngaihdante pawh an lo sawi ve ṭhin a, a hlawkthlak hlein ka hria a ni,"a ti. Hyderabad, Bhubaneswar, Jaipur, leh Mumbai-ahte budget outreach program hi neih a ni tawh a, hmarchhak bialah Sikkim chu 'gateway of Northeast' a nih avangin, Sikkim khawpui Gangtok-ah he program hi an rawn buatsaih leh tih a sawi.

Finance Minister hian nimin khan virtual hmangin Yangang Ropeway Project a hawng bawk. Ropeway hi Dhapper-Bhaleydhunga inkarah siam niin, PM DevINE hnuaiah siam a ni. Minister hian nimin vek khan Lachen-a border village-te a tlawh nghal bawk a ni.