Vawiinah hmarchhak state 3 assembly inthlana vote tla chhiar dawn

Meghalaya, Nagaland leh Tripura legislative assembly inthlan neih zawh taka vote tlate chu vawiin hian chhiar a ni dawn. Zing dar 8 aṭangin vote tlate hi chhiar ṭan a ni ang.

Tripura-a assembly constituency 60-ah February 16 khan inthlan hi neih a ni a, February 27-ah Meghalaya-a constituency 59 leh Nagaland-a constituency 59-ah inthlan hi neih a ni bawk. Tripura-ah hian candidate 259 an awm a, Meghalaya-ah 375 leh Nagaland-ah candidate 184 an awm.

Vote thlakna, polling station hi Tripura-ah 3,337, Meghalaya-ah 3,419 leh Nagaland-ah 2,291 siam a ni.

Tripura-ah hian vote nei mi nuai 28.24 awmin, Meghalaya-ah nuai 21 leh Nagaland-ah mi nuai 13 chuang an awm bawk a ni.

February 16-a Tripura assembly inthlanah khan vote 87.6% a tla a, February 27-a inthlan neihna, Meghalaya-ah vote 85.17% tlain, Nagaland-ah inthlan ni ah vote 85.90% tlain chhinchhiah ni mah se, polling staton paliah nimin khan vote thlak ṭhat a nih avangin a la danglam leh dawn a ni.

Vote chhiar ni hian buaina a chhuah lohna turin state pathumah venhimna uluk taka kalpuiin, counting hall-te pawh ṭha taka ven an ni. Tripura-ah chuan counting centre 21 siam a ni a, counting observer 60 leh micro observer eng emaw zat awmin, Meghalaya-ah chuan district 12 leh sub-division pakhatah counting centre 13 siam niin counting observer 27 leh micro observer 500 an awm. Nagaland-ah chuan district headquarters 16-ah counting centre 59 siamin, vote tlate hi chhiar a ni ang.

Nagaland : Polling station 4-ah vote thlak ṭha

Nagaland-a assembly constituency pali huamchhunga polling station paliah nimin khan vote thlak ṭhat a ni. Zing dar 7 aṭanga tlai dar 4 thleng vote thlak hun hi hawn a ni.

Vote thlak ṭhatnate hi Zunbehoto constituency-a New Colony polling station, Sanis constituency-a Pangti V polling station, Tizit constituency-a Jaboka Village leh Thonoknyy constituency-a Pathso East Wing-ahte a ni. State election official-te chuan vote thlak ṭhat a ngaihna chhan hi an sawilang lo.

Thawhṭanni khan Nagaland legislative assemby inthlan hi neih a ni a, polling station 2,291-ah vote thlak niin, Thawhlehni khan Election Commission of India (ECI) chuan polling station pali ah vote thlak ṭhat a nih tur thu a puang. Commission chuan general observer-te report thehluh leh thil thlengte ngun taka ngaihtuah a nih hnuah, Thawhṭannia heng polling station palia vote tlate chu pawm a ni lo tih sawiin, vote thlak ṭha tur hian a ti ta niin EC under-secretary Surender Singh chuan a sawi.