AP-ah ram chhunga hydropower project lian ber tur pawm

Sorkar laipui chuan Arunachal Pradesh-ah ramchhunga hydropower project lian ber tur, Dibang hydropower project siamna tur a pawm.

Lower Dibang Valley district-a Dibang luia project thawhna tura sum ruahman hi USD tluklehdingawn 9 (Rs vbc 31,876) a ni a, kum kua chhunga zawh hman tura tih a ni.

2,880-megawatt project hi sorkar laipui hnuaia hydropower board, NHPC Limited in a thawk ang. Zawh fel a nih hunah chuan meter 278-a sang dam chu India rama structure sang ber a ni dawn a ni.

Dibang project hi forest land hectare 5,000 chuanga zauah siam a ni dawn, hei vang hian harsatna hrang hrang pawh a awm chhoh rin a ni. Environment a tichhe nasa dawn a, mi eng emaw zat sawnchhuah an ngaih dawn bawk vangin, tualchhung mite lam aṭangin dodalna pawh a awm ngei rin a ni.

He project hi zawh a nih hunah, Aruanchal Pradesh sorkar chuan power siamchhuah aṭanga 12% chu a thlawnin a dawng thei dawn a ni. Kum 40 chhunga AP sorkarin project aṭanga free power leh local area development funds (LADF) a dawn tur hi Rs vbc 26,785 a tling thei ang.