Assam-in folk dance-ah Guinness World Record siam tum

Assam chuan April 14 hian Bihu dance lian ber buatsaih a tum a, folk dance-ah Guinness Book of World Records siam a tum.

Assam chief minister Himanta Biswa Sarma chuan state sorkar huaihawta world record siam an tum chungchang hi sawiin, hei hi khawvel huapa Bihu dance chawilarna tur a ni nghal tih a sawi.

Chief Minister chuan April 14-a Guwahati-a hun buatsaih turah hian dancer leh drummer 11,140 an tel dawn tih sawiin, prime minister Narendra Modi pawhin he hun hi a hmanpui dawn tih a sawi. India state dang zawnga chief minister leh governor-te pawh an sawm vek dawn a, March 20-30 chhung hian sawm turin minister hrang hrangte chu an zin kual dawn a ni, a ti.

Ambassador leh G20-a high commissioner te, India-a South East Asia palaite pawh an programme buatsaihah hian an sawm tur thu CM chuan a sawi bawk.

Bihu dance lian ber buatsaihna turah tel turte hi mipa leh hmeichhia 30:70 niin, district tin aṭangin an tel dawn a ni. State sorkar chuan Guinness World Record-ah Bihu dance sample video pawh a thawn tawh bawk a ni.

"Ruahman lawk ang kan tih theih chuan hmun pakhata Bihu dance nei tam ber kan ni dawn a, minute 15 chhung a awh ang," tiin CM chuan a sawi. He huna telte hi an inthuamna leina tur, Rs 10,500 ṭheuh pek an ni dawn tih a sawi bawk.

Sarma chuan Nagaland Hornbill Festival lawm dan zulzuiin, nakkum aṭang chuan Bihu festival chu Sivasagar leh Guwahati-ah ni sarih chhung lawm a ni ṭhin tawh dawn tih a sawi a, Assam calendar event-ah pawh telh a ni tawh ang, a ti.