Assembly election 2023 : Nagaland leh Tripura-ah BJP leh a thawhpuite chak Meghalaya-ah NPP-in seat la hnem ber

3rd March, 2023

Hmarchhak state pathum - Meghalaya, Nagaland leh Tripura assembly inthlana vote tlate chu nimin khan chhiarin result puan a ni.

State pathumah hian assembly seat 60 ṭheuh an awm a, Tripura-a assembly constituency 60-ah February 16 khan inthlan hi neih a ni a, February 27-ah Meghalaya-a constituency 59 leh Nagaland-a constituency 59-ah inthlan hi neih a ni bawk. Meghalaya-ah hian bial pakhatah candidate a thih avangin inthlan hi neih a ni ve lo a, Nagaland-ah bial pakhata BJP candidate chu chuhtu dang awm loin a tling sa bawk a ni.

Tripura-ah hian candidate 259 an awm a, Meghalaya-ah 375 leh Nagaland-ah candidate 184 an awm.

Nagaland-ah rorellai, National Democratic Progressive Party (NDPP) leh Bharatiya Janta Party (BJP) thawkdun chuan sorkar an siam leh thei dawn a, Tripura-ah rorellai BJP leh a thawhpui, Indigenous Progressive Front of Tripura (IPFT) pawhin majority an nei pha bawk. Meghalaya-ah chief minister Conrad K Sangma kaihhruai, National People's Party (NPP) chu party mala seat la hnem ber ni mah se party malin sorkarna erawh a siam thei dawn lo. State pathumah hian sorkarna siam turin MLA 31 neih phak a ngai ṭheuh a ni.

Meghalaya :
Meghalaya-a seat 59-a inthlan neihah, NPP chuan seat 26 an la a, kum 2018 assembly inthlan aiin seat 6-in an la hnem zawk.

UDP chuan seat 11 an la a, inthlan hmasa aiin seat 4 in an la hnem. Congress party chuan seat 5 lain, kum 2018 inthlan aiin seat 16 in an la tlem zawk thung. Trinamool Congress chuan seat 5 a la a, BJP-in seat 2 a la bawk.

NPP hian party mala sorkarna a siam phak loh avangin Meghalaya Democratic Alliance (MDA) sorkar hnuaia a lo thawhpui, BJP chu ṭangrual sorkar a siampui leh rin a ni. Result puan hma, Nilaini zan khan state pahnih chief minister, Conrad Sangma leh Himanta Biswa Sarma-te chuan Guwahati-ah meeting an nei a, an thil ngaihtuahte sawilang lo mah se, thawhdun zel dan tur pawh an sawidun tel rin a ni.

Party-te seat lak zat
All India Trinamool Congress - 5
Bharatiya Janata Party - 2
Hill State People’s Democratic Party - 2
Independent - 2
Indian National Congress - 5
National People's Party - 26
People's Democratic Front - 2
United Democratic Party - 11
Voice of the People Party - 4

Nagaland :
Nagaland-ah rorellai, NDPP leh BJP ṭangdun chu hneh taka thlan tlin leh niin, assembly seat 60-ah seat 37 zet an la pha a, inthlan hmasa aiin seat 7 in an la hnem zawk.

Naga People's Front (NPF) in seat 2 an la a, Congress party erawh an artelukawn.

NDPP leh BJP hruaitute chuan nizan khan Kohima-ah meeting neiin, ṭangrual sorkar thar siam dan tur chungchang an sawiho nghal a ni. NDPP leh BJP hian inremna siamsa vekin inthlan hi an chuh a, NDPP-in seat 40 leh BJP-in seat 20-ah candidate an siam a ni.

Party-te seat lak zat
Bharatiya Janata Party - 12
Independent - 4
Janata Dal (United) - 1
Lok Janshakti Party(Ram Vilas) - 2
Naga Peoples Front - 2
National People's Party - 5
Nationalist Congress Party - 7
Nationalist Democratic Progressive Party - 25
Republican Party of India (Athawale) - 2

Tripura :
Tripura-ah rorellai, BJP leh a thawhpui IPFT chuan hnehna changin, seat 33 an la a, mahse inthlan hmasa aiin seat lak lak zat hi 11 in a tlem thung.

Congress leh Left Party thawkdun chuan seat 14 an la. Regional party ṭhangduang tak, Tipra Motha chuan seat 13 an la bawk a, party mala seat la hnem ber dawttu a ni pha.

Party-te seat lak zat
Bharatiya Janata Party - 32
Communist Party of India (Marxist) - 11
Indian National Congress - 3
Indigenous People's Front of Tripura - 1
Tipra Motha Party - 13