Nagaland-in a ṭum khatna atan hmeichhe MLA nei dawn

Nagaland chuan kum 1963-a state puitlinga hlankai an nih hnua a ṭum khatna atan hmeichhe MLA an nei ve dawn ta.

Tun ṭum inthlanah hian hmeichhe candidate pali an awm a, an zinga pahnih, NDPP candidate ve ve, Hekani Jakhalu leh Salhoutuonuo Kruse-te chu thlan tlin an ni.

Lawyer leh social activist, Jakhalu-i hi Diampur II bialah thlan tlin niin amah hnaih bertu, Lok Janshakti Party (Ram Vilas) candidate Azehot Zhimoni chu vote 1,536 in a hneh a, vote tla aṭangin 45.16% a hmu.

Kruse-i hi Western Angami AC constituency-ah thlan tlin niin, independent candidate Kaneizhakho Nakhro chu vote 7 chauhin a hneh ve bawk a ni.

Nagaland CM Rio-a'n vote 17,045 hmu

Nagaland chief minister, NDPP-BJP chief ministerial candidate ni bawk, Neiphiu Rio chu northern Angami-II bialah hneh taka thlan tlin leh a ni.

Nagaland chief minister ni rei ber, Rio hian vote 17,045 a hmu a, a khingpui Congress party candidate Syievilie Schu chuan vote 1,221 chauh a hmu pha. Nagaland-a NDPP-BJP hian sorkarna an siam leh dawn avangin,Rio hi CM a ni chhunzawm leh thei dawn a ni.