Meghalaya Home Minister James K Sangma a tling lo

Meghalaya cabinet minister, chief minister Conrad K Sangma-a u, James Sangma chu Garol Hills-a Dadenggre bialah a tling zo lo.

NPP MLA term thum lo ni tawh, James Sangma hian Trinamool Congress (TMC) candidate Rupa M Marak chu vote 18 in a hneh zo lo a ni.

James Sangma hian NPP kaihhruai MDA sorkarah home ministry bakah law, power, district council affairs, food civil supplies leh cosumer affairs-te a enkawl.

Congress Lok Sabha MP leh, Meghalaya-a party president ni mek Vincent H. Pala pawh a chak zo lo. Sutnga-Saipung bialah NPP candidate, Santa Mary Shylla chuan Pala bakah MLA nilai, UDP candidate Shitlang Pale-te a hneh a ni.

Meghalaya CM-in a khingpui vote 10,000 chuangin hneh

Meghalaya chief minister Conrad K Sangma chuan South Tura constituency-ah a khingpui, BJP candidate Bernard Marak chu vote 10,090 in a hneh.

BJP hruaitu, Marak hian vote 7,260 chauh a hmu pha a ni.

CM Sangma chuan Meghalaya mipuite chungah lawmthu sawiin, party malin sorkarna siam thei lo mah se, an thawhpui tur chungchang chu party hruaitute nen an la ngaihtuah ho dawn tih a sawi.

Kum 2 chhungin party lian ber dawttu kan ni thei : Pradyot Debbarma

Tripura regional party, Tipraha Indigenous Progressive Regional Alli­ance (TIPRA Motha), chuan seat 13 lain, party mala seat la hnem ber dawttu a ni.

Tipra Motha ho­tu, Pradyot Debbarma chuan an party chu kum hnih chhung lekin state chhunga party lian ber dawttu an ni thei tih sawiin, thil chhinchhiahtlak a nih thu a sawi. Tun ṭum hi assembly inthlan an chuh vawi khatna niin, seat 42-ah candidate an siam a ni.

Kum 2021-ah Tipra Motha hian Tripura Triba Areas Autonomous District Council (TTAADC) inthlana hnehna an lo chang tawh bawk.

Vote 1,257 chauhin Tripura CM Manik Saha a chak

Tripura chief minister, BJP candidate Manik Saha chu Town Bordowali bialah thlan tlin leh niin, amah hnaih bertu Congress candidate Ashish Kumar Saha chu vote 1,257 chauhin a hneh.

Nikum June thla khan he biala by-election neihah Manik Saha leh Ashish Kumar Saha bawk hi an lo inkhing tawh a, hemi ṭum hian Manik Saha hi vote 6,104 in a chak a ni. Tun ṭum inthlanah hian thlan nawn leh ni mah se, Congress candidate a hnehna vote hi a tlahniam hle tawh thung.