Meghalaya : NPP hotu Conrad Sangma-a'n Governor a hmu

Meghalaya legislative assembly inthlan neih taka party mala seat la hnem ber, National People's Party (NPP) hotu Conrad K Sangma chuan nimin khan governor Phagu Chauhan a hmu a, sorkar thar an siam theih tur thu a hrilh.

Assembly inthlanah hian NPP hi seat la hnem ber ni mah se, party malin sorkarna a siam pha lo. Hei vang hian party dangte an thawhpui a ngai dawn a ni.

Meghalaya assembly seat 60 zinga 59-ah inthlan hi neih a ni a, NPP hian seat 26 an la a ni. United Democratic Party (UDP) chuan seat 11 lain, Trinamool Congress (TMC) in seat 5, Indian National Congress (INC) in seat 5, Voice of the People Party-in seat 4 bakah, BJP, Hill State People's Democratic Party, People's Democratic Front leh indepdent candidate-ten seat 2 ṭheuh an la bawk.

NPP hian sorkarna siam turin MLA thlawptu 32 a neih tlin a ngai a ni.

Conrad Sangma chuan sorkarna siam turin NPP hian thlawptu a ngah tawk tih a sawi a, "Majority kan nei a ni. BJP-in min thlawp dawn tih an sawi chiang tawh a, anni bakah midang min thlawp tur pawh an bawk," tiin a sawi.

Governor nena meeting an neihnaah hian Sangma chuan Meghalaya chief minister a nihna aṭanga banna lehkha pawh a thehlut nghal bawk. Sangma hi BJP hruaitu pahnih, Al Hek leh Sanbor Shullai-ten an ṭawiawm a ni.

Party mala seat la hnem ber dawttu, UDP hi Sangma kaihhruai sorkar hmasaah khan an tel a, tun ṭumah hian NPP hi an thlawp chhunzawm leh dawn em tih an la sawi chiang lo.