Nagaland CM term 5-na chelh tur Neiphiu Rio

Nagaland assembly inthlanah rorellai, National Democratic Progressive Party (NDPP) leh Bharatiya Janata Party (BJP) ṭang dun chu hneh taka thlan tlin niin, sorkar thar an siam chhunzawm leh dawn.

Party pahnih thawk dun hian Nagaland assembly seat 60-a seat 33-ah hnehna an chang a ni.

NDPP-BJP chief ministerial candidate, Neiphiu Rio chu hnehna an chan leh tak avangin a zawnin Nagaland chief minister term nga a chelh thei dawn a ta ni. Rio hian Nagaland CM ni rei thei ber record a siam sa tawh a ni.

Kum 72 mi, Rio hian kum naupangte a nih aṭangin politics hi a luhchilh a, kum 50 zet politics field-ah hian a tal tawh a ni. State assembly inthlan hi ṭum riat a chuh hmasa ber tih lohah chuan thlan tlin vek a ni. Inthlan a chuh hmasak ber, kum 1987-ah khan independent candidate in a ding a, hemi ṭum hian a tling zo lo.

Kum 1989-ah Congress party a zawm a, hemi hnu hian inthlan a chuhah pawh thlan tlin chhoh zel a ni tawh. Dinhmun pawimawh tak tak a chelh chho a, JC Jamir ministry-ah khan kum 2002 thleng home minister pawh a lo ni tawh bawk. Mahse hemi kum vek hian Congress party chhuahsanin, Naga People's Front (NPF) a rawn tuaithar chho leh a ni.

Kum 2003-ah Rio hi a ṭum khatna atan Nagaland chief minister a rawn ni a, mahse kum 2008, January thlaah Nagaland chu President's Rule hnuaiah dah a nih tak vangin CM a nihna pawh hnawl a ni zui ve leh a ni.

Kum 2008-a inthlan buatsaihah Rio kaihhruaina hnuaiah NPF chu party mala seat la hnem ber niin, NPF kaihhruai ṭangrual sorkar Democratic Alliance of Nagaland a ding. Kum 2013 inthlanah NPF chuan hnehna chang lehin, Rio chuan term thumna atan CM-ah a awm leh a ni.

Kum 2014 khan CM a nihna aṭanga bangin, national politics lamah a lut a, Lok Sabha member-ah thlan a ni. National politics lamah a luh chhan chu Naga peace talk neih mekah, chak zawka hma lak leh inremna siam a nih thuai theihna tura sorkar laipui nawr a, an state mipuite tana aw chhuahtu nih a duh vang tih a sawi.

Mahse kum 2018, February 9 khan Lok Sabha member a nihna aṭanga bangin, state politics lamah a kir leh a ni. NPF chhunga buaina a awm avangin party ding thar, Nationalist Democratic Progressive Party (NDPP) a zawm a, NDPP hruaitu atan thlan a ni zui bawk.

Kum 2018 inthlan dawn khan NDPP chuan BJP inremna siamin an thawkdun a, inthlanah seat 30 lain NPP, JDU leh independent MLA-te thlawpna nena ṭangrual sorkar thar an din a,Nagaland-a kum 15 chhung zet NPF-in sorkarna an lo siam tawh chu an tihtawpsak. Tun ṭum inthlanah pawh NDPP leh BJP hi thawkdun lehin, hneh taka thlan tlin an ni leh ta a ni.